கெடும்
என்று முடியும் குறள்கள்
கொன்றன்ன வின்னா செயினு மவர்செய்த
வொன்றுநன் றுள்ளக் கெடும்
இளங்குமரனார்
கொலைக்கு ஒப்பான தீமையை ஒருவர் செய்தாலும் அவர் செய்த நன்மை ஒன்றை நினைக்க அத்தீமை ஒழியும்.
மறப்பினு மோத்துக் கொளலாகும் பார்ப்பான்
பிறப்பொழுக்கங் குன்றக் கெடும்
இளங்குமரனார்
படிப்பவன் படிப்பை மறந்தாலும் பெறலாம். ஒழுக்கத்தை இழந்தால் இழிவாம்.
கொடுப்ப தழுக்கறுப்பான் சுற்ற முடுப்பதூஉ
முண்பதூஉ மின்றிக் கெடும்
இளங்குமரனார்
பிறன் கொடுப்பதையும் தடுக்க நினைப்பவன் தன் சுற்றத்துடன் ஊணும் உடையும் இல்லாமல் கெடுவான்.
அருள்வெஃகி யாற்றின்க ணின்றான் பொருள்வெஃகிப்
பொல்லாத சூழக் கெடும்
இளங்குமரனார்
அருளை விரும்பி நல்வழியில் நடப்பவன் பிறர் பொருளை விரும்பினால் அவ்வளவில் தீமை சூழ்ந்து கெடுவான்.
களவினா லாகிய வாக்க மளவிறந்
தாவது போலக் கெடும்
இளங்குமரனார்
திருட்டால் வரும் பொருள் அளவு இல்லாமல் பெருருவது போல் காட்டி இல்லாமல் போய்விடும்.
வருமுன்னர்க் காவாதான் வாழ்க்கை யெரிமுன்னர்
வைத்தூறு போலக் கெடும்
இளங்குமரனார்
அழிவு வருமுன்னரே தடுத்துக் கொள்ளாதவன் வாழ்வு. தீயின் முன் வைக்கோற் போரென அழியும்.
செயற்பால செய்யா திவறியான் செல்வ
முயற்பால தன்றிக் கெடும்
இளங்குமரனார்
செய்ய வேண்டியதற்கும் செலவிடாத கருமியின் செல்வம், காக்கவும் இயலாமல் அழிந்து போகும்.
இடிப்பாரை யில்லாத வேமரா மன்னன்
கெடுப்பா ரிலானுங் கெடும்
இளங்குமரனார்
கண்டித்துச் சொல்லும் பெரியவர் பாதுகாப்பு இல்லாத தலைவன் பகைவர் இல்லாமலே கெட்டுப் போவான்.
செய்தக்க அல்ல செயக்கெடும் செய்தக்க
செய்யாமை யாங் கெடும்
இளங்குமரனார்
செய்யக் கூடாதவற்றைச்செய்தலும் கேடு ஆக்கும்; செய்யத் தக்கவற்றைச் செய்யாதிருத்தலும் கேடு ஆக்கும்.
அமைந்தாங் கொழுகா னளவறியான் தன்னை
வியந்தான் விரைந்து கெடும்
இளங்குமரனார்
பொருந்த நடவாமை, அளவு கருதாமை, தற்பெருமை என்பவற்றை உடையவன் தானே விரைவில் கெடுவான்.
அளவறிந்து வாழாதான் வாழ்க்கை யுளபோல
இல்லாகித் தோன்றாக் கெடும்
இளங்குமரனார்
அளவறிந்து வாழமாட்டாதன் வாழ்வு, நன்றாக இருப்பது போல் தோன்றி இல்லாமல் கெட்டுப் போகும்.
உளவரை தூக்காத வொப்புர வாளன்
வளவரை வல்லைக் கெடும்
இளங்குமரனார்
தம்மிடம் உள்ள அளவினை எண்ணாமல் கொடுக்கும் எடை, தம் பொருள் அளவினை விரைவில் கெடுமாறு செய்யும்.
எண்பதத்தா னாடி முறைசெய்யா மன்னவன்
றண்பதத்தாற் றானே கெடும்
இளங்குமரனார்
எளிமையாக இருந்து ஆய்ந்து ஆட்சி செய்யாதவன் இரங்கத்தக்க தன்மையால் தானே கெட்டுப் போவான்
நாடொறு நாடி முறைசெய்யா மன்னவ
னாடொறு நாடு கெடும்
இளங்குமரனார்
ஒவ்வொரு நாளும் எண்ணி நல்லதைச் செய்யாத ஆட்சியனின் ஆட்சியில் நாடு, நாள்தோறும் கேடு அடையும்.
வெருவந்த செய்தொழுகும் வெங்கோல னாயி
னொருவந்த மொல்லை கெடும்
இளங்குமரனார்
அஞ்சத் தக்கவற்றைச் செய்யும் கொடிய ஆட்சியன் என்றால் அவன் முழுவதாக விரைவில் கெடுவான்.
இறைகடிய னென்றுரைக்கு மின்னாச்சொல் வேந்த
னுறைகடுகி யொல்லைக் கெடும்
இளங்குமரனார்
ஆள்பவன் கொடியவன் என்று மக்கள் சொல்லும் சொல்லால் அவன் வாழ்நாள் குறைந்து கெடுவான்.
கடுஞ்சொல்லன் கண்ணில னாயி னெடும்செல்வ
நீடின்றி யாங்கே கெடும்
இளங்குமரனார்
வன்சொல் சொல்பவனாகவும் அருள் இல்லாதவனாகவும் இருப்பவன் நெடிய வளமும் நீளாமல் கெடும்.
செருவந்த போழ்திற் சிறைசெய்யா வேந்தன்
வெருவந்து வெய்து கெடும்
இளங்குமரனார்
முன்னரே பாதுகாப்பைத்தேடாதஆட்சியன், பகையழிக்க வரும் போது அஞ்சிக் கொடுமையாக அழிவான்.
குடியென்னுங் குன்றா விளக்க மடியென்னு
மாசூர மாய்ந்து கெடும்
இளங்குமரனார்
குடும்பம் என்று சொல்லப்படும் குறையா விளக்கு, சோம்பல் என்னும் கருக்குஏற ஒளிகுறைந்து அழியும்
குடியாண்மை யுள்வந்த குற்ற மொருவன்
மடியாண்மை மாற்றக் கெடும்
இளங்குமரனார்
குடும்ப ஆளுமையில் ஏற்பட்ட குற்றத்தையும் கூட, ஒருவன் சுறுசுறுப்பால் மாற்றியமைக்க முடியும்.
தாளாண்மை யில்லாதான் வேளாண்மை பேடிகை
வாளாண்மை போலக் கெடும்
இளங்குமரனார்
முயற்சி இல்லாதவன் செய்யவிரும்பும் உதவி, பயிற்சி இல்லாதவன் கருவிபோல் பயன்படாது.
வெள்ளத் தனைய விடும்பை யறிவுடையா
னுள்ளத்தி னுள்ளக் கெடும்
இளங்குமரனார்
வெள்ளப் பெருக்குப் போலத் துன்பம் வந்தாலும் அறிவாளன் மனத்தில் நினைத்த அளவிலேயே அழிந்து விடும்.
ஒலித்தக்கா லென்னா முவரி யெலிப்பகை
நாக முயிர்ப்பக் கெடும்
இளங்குமரனார்
எலிகள் கடல்போல் கூடி ஒலித்தாலும் என்ன, பாம்பு மூட்சுவிட்ட அளவில் ஓடிப்போகும்.
ஏந்திய கொள்கையார் சீறி னிடைமுரிந்து
வேந்தனும் வேந்து கெடும்
இளங்குமரனார்
உயர்ந்த கொள்கையுடையபெரியவர் சினத்துக்கு ஆட்படின் ஆட்சியரும் அதனை இழந்து கெட்டுப்போவர்.
குடிசெய்வார்க் கில்லை பருவம் மடிசெய்து
மானங் கருதக் கெடும்
இளங்குமரனார்
குடும்பத்தைக் காப்பவர் காலம் பாரார். அவர் சோம்பலும் மானமும் கொண்டால் குடிகெடும்.
கரப்பிடும்பை யில்லாரைக் காணி னிரப்பிடும்பை
யெல்லா மொருங்கு கெடும்
இளங்குமரனார்
மறையாமல் கொடுப்பவரைக் கண்டபோதே, வறுமை யெல்லாம் ஒழிந்துவிடும்.
இரவுள்ள வுள்ள முருகுங் கரவுள்ள
உள்ளதூஉ மின்றிக் கெடும்
இளங்குமரனார்
இரப்பதை எண்ண உள்ளம் உருகும்; இல்லை என்று மறைப்பவரை எண்ண உள்ளம் உலர்ந்துபோகும்.
நினைப்பவர் போன்று நினையார்கொல் தும்மல்
சினைப்பது போன்று கெடும்
இளங்குமரனார்
நினைப்பவர் போல் நினையார் போலும்! தும்மல் வருவதுபோல் வந்து வரவில்லையே!