உலகு
என்று முடியும் குறள்கள்
அகர முதல வெழுத்தெல்லா மாதி
பகவன் முதற்றே யுலகு
இளங்குமரனார்
எழுத்துக்களுக்கு எல்லாம் அகரமே முதல்; அதுபோல், பகுத்து வழங்கிய ஆற்றலே உலகுக்கு முதல்.
இருமை வகைதெரிந் தீண்டறம் பூண்டார்
பெருமை பிறங்கிற் றுலகு
இளங்குமரனார்
ஆக்கமும் அழிவுமாம் இருவகையும் தெரிந்த துறவோர் பெருமையே பெருமை.
சுவையொளி யூறோசை நாற்றமென் றைந்தின்
வகைதெரிவான் கட்டே யுலகு
இளங்குமரனார்
சுவை முதலியவற்றின் விரிவுகளைத் தெரிந்தவர் வழியிலேயே உலகியக்கம் உள்ளது.
பெற்றாற் பெறிற்பெறுவர் பெண்டிர் பெருஞ்சிறப்புப்
புத்தேளிர் வாழு முலகு
இளங்குமரனார்
சிறந்த கணவனைப் பெற்றால் பெற்ற மனைவி தெய்வ வாழ்வினளாகத் திகழ்வாள்.
கைம்மாறு வேண்டா கடப்பாடு மாரிமாட்
டென்னாற்றுங் கொல்லோ வுலகு
இளங்குமரனார்
திரும்பப் பெறுதலை விரும்பாது கொடுக்கும் மழைக்கு உலகோர் என்னதான் கைம்மாறு செய்வரோ?
நிலவரை நீள்புக ழாற்றிற் புலவரைப்
போற்றாது புத்தே ளுலகு
இளங்குமரனார்
உலகம் பாராட்டும் புகழைச் செய்தால் உயர்ந்தவர் கூட்டம், வெற்றறிவினரைப் பாராட்டாது.
கள்வார்க்குத் தள்ளு முயிர்நிலை கள்ளார்க்குத்
தள்ளாது புத்தே ளுலகு
இளங்குமரனார்
களவுத் தொழிலர்க்கு வாழ்வு குன்றும் களவைக் கருதாதவர்க்குப் புகழுலகம் கிட்டும்.
இன்சொலா லீத்தளிக்க வல்லாற்க்குத் தன்சொலாற்
றான்கண் டனைத்திவ் வுலகு
இளங்குமரனார்
இனியவை கூறிக் கொடை வழங்கும் வளமுடையவளுக்கு அவன் சொற்படியும் நினைவுப்படியும் மக்கள் அமைவர்.
செவிகைப்பச் சொற்பொறுக்கும் பண்புடை வேந்தன்
கவிகைக்கீழ்த் தங்கு முலகு
இளங்குமரனார்
வெறுக்கும் சொல்லையும் பொறுக்கும் ஆட்சியாளனின் கீழ் மக்கள் இனிது வாழ்வர்.
எள்ளாத வெண்ணிச் செயல்வேண்டுந்
தம்மொடு கொள்ளாத கொள்ளா துலகு
இளங்குமரனார்
இயல்பொடு பொருந்தாத செயலைச் செய்வதை உலகம் கொள்ளாது. ஆதலால், பழிவராச் செயலைச் செய்க.
நாடோறு நாடுக மன்னன் வினைசெய்வான்
கோடாமை கோடா துலகு
இளங்குமரனார்
ஆள்பவன் நாள்தோறும் செயலாற்றுவாரை ஆராய்க அவர் தவறாமையே உலகத் தவறாமையாம்.
குடிதழீஇக் கோலோச்சு மாநில மன்ன
னடிதழீஇ நிற்கு முலகு
இளங்குமரனார்
குடிமக்களைத் தழுவி ஆளும் தலைவனின், அடியைத் தழுவி உலகமக்கள் வாழ்வர்.
கண்ணோட்ட மென்னுங் கழிபெருங் காரிகை
யுண்மையா னுண்டிவ் வுலகு
இளங்குமரனார்
கண்ணோட்டம் என்று சொல்லப்படும் மிகப்பெரிய நன்மை உள்ளதால் இந்த உலகம் வாழ்கின்றது.
கருமஞ் சிதையாமற் கண்ணோட வல்லார்க்
குரிமை யுடைத்திவ் வுலகு
இளங்குமரனார்
எடுத்த செயல் அழியாமல் கண்ணோட்டம் செய்ய வல்லவர்க்கே இவ்வுலகப் பேறு உரிமை உடையதாம்.
வினைக்கண் வினைகெட லோம்பல் வினைக்குறை
தீர்ந்தாரிற் றீர்ந்தன் றுலகு
இளங்குமரனார்
எடுத்த செயலை முடியாதவரை உலகம் மதியாது; ஆதலால் அதனை இடைத் தடையின்றி முடித்தல் வேண்டும்.
எனைத்திட்ப மெய்தியக் கண்ணும் வினைத்திட்பம்
வேண்டாரை வேண்டா துலகு
இளங்குமரனார்
எத்தனை வகை உறுதிகளை உடையவராக இருப்பினும் செயலுறுதி இல்லாதவரை உலகம் விரும்பாது.
கெடாஅர் வழிவந்த கேண்மையார் கேண்மை
விடாஅர் விழையு முலகு
இளங்குமரனார்
இடையீடு இல்லாமல் தொடரும் நண்பினரின் நட்பை உயர்ந்தோரும் மிகவிரும்பிப் போற்றுவர்.
அறிவின்மை யின்மையு ளின்மை பிறிதின்மை
இன்மையா வையா துலகு
இளங்குமரனார்
இல்லாமையுள் இல்லாமை அறிவில்லாமை; மற்றை இல்லாமையை இல்லாமையாக உலகம் பழியாது.
பகைநட்பாக் கொண்டொழுகும் பண்புடை யாளன்
தகைமைக்கட் டங்கு முலகு
இளங்குமரனார்
பகையாக இருப்பாரையும் நட்பாகக் கொள்ள வல்லான் பெருந்தன்மையில் உலகம் உய்யும்.
இளிவரின் வாழாத மான முடையா
ரொளிதொழு தேத்து முலகு
இளங்குமரனார்
இழிவு வரும்போதில் வாழாத பெருமையினர் அழியாப் புகழை உலகோர் பாராட்டுவர்.
நயனொடு நன்றி புரிந்த பயனுடையார்
பண்புபா ராட்டு முலகு
இளங்குமரனார்
நல்லுள்ளத்தோடு நன்மை செய்யும் நல்லோர் பண்பை உலகோர் பாராட்டுவர்.
பிறர்பழியுந் தம்பழிபோல் நாணுவார் நாணுக்
குறைபதி யென்னு முலகு
இளங்குமரனார்
பிறர் இழிவுக்கும் தம் இழிவுக்கும் நாணங் கொள்பவரே, நாணத்திற்கு இருப்பிடமானவர் என்பர்.
குற்ற மிலனாய்க் குடிசெய்து வாழ்வானைச்
சுற்றமாச் சுற்று முலகு
இளங்குமரனார்
குறை இல்லாமல் குடும்பத்தை உயர்த்துபவனை உலகமே சுற்றமாகச் சுற்றி நிற்கும்.
தாம்வீழ்வார் மென்றோட் டுயிலி னினிதுகொல்
தாமரைக் கண்ணா னுலகு
இளங்குமரனார்
தம்மை விரும்புவாரைத் தழுவி உறங்குவதினும் இனியதோ, மாயவன் உலக இன்பம்.