தலை
என்று முடியும் குறள்கள்
கோளில் பொறியிற் குணமிலவே யெண்குணத்தான்
றாளை வணங்காத் தலை
இளங்குமரனார்
இயக்கமில்லாப் பொறிகளால் பயனில்லாமைபோல் நற்குணத்தவனை மதியாத் தலையால் பயனில்லை.
தென்புலத்தார் தெய்வம் விருந்தொக்க றானென்றாங்
கைம்புலத்தா றோம்ப றலை
இளங்குமரனார்
சிறந்த அறிவினர், முனிவர், விருந்தினர், சுற்றத்தார் ஆகியவரொடு தன்னையும் பேணல் இல்வாழ்வான் கடமை.
இயல்பினா னில்வாழ்க்கை வாழ்பவ னென்பான்
முயல்வாரு ளெல்லாந் தலை
இளங்குமரனார்
முறையாக இல்வாழ்க்கை வாழ்பவன் முயற்சியாளர் அனைவர்க்கும் தலைமையானவன்.
சிறைகாக்குங் காப்பெவன் செய்யு மகளிர்
நிறைகாக்குங் காப்பே தலை
இளங்குமரனார்
கட்டுப்படுத்திக் காக்கும் காவல், காவல் ஆகாது; மகளிர்க்குத் தம் கற்புக் காவலே காவலாம்.
அகழ்வாரைத் தாங்கும் நிலம்போலத் தம்மை
யிகழ்வார்ப் பொறுத்த றலை
இளங்குமரனார்
தோண்டுபவரையும் சுமக்கும் நிலத்தைப் போலத் தம்மை இகழ்பவரையும் பொறுத்தல் உயர்ந்த பண்பு.
மனத்தொடு வாய்மை மொழியிற் றவத்தொடு
தானஞ்செய் வாரின் தலை
இளங்குமரனார்
மனமார உண்மை உரைத்தால், அது தவமும் கொடையும் செய்பவரிலும் உயர்வு ஆக்கும்.
எனைத்தானு மெஞ்ஞான்றும் யார்க்கும் மனத்தானு
மாணாசெய் யாமை தலை
இளங்குமரனார்
எவ்வளவாயினும் எப்பொழுதாயினும் எவர்க்கும் மனமறியத் தீமை செய்யாதிருத்தல் உயர்வாகும்.
பகுத்துண்டு பல்லுயி ரோம்புத னூலோர்
தொகுத்தவற்று ளெல்லாந் தலை
இளங்குமரனார்
நூலவர் சொல்லியவற்றுள் தலைமையானது பகுத்துத் தந்து பலவுயிர்களையும் பேணுவதாம்.
நிலையஞ்சி நீத்தாரு ளெல்லாங் கொலையஞ்சிக்
கொல்லாமை சூழ்வான் றலை
இளங்குமரனார்
உலக நிலைக்கு அஞ்சித் துறந்தவருள் உயர்ந்தவன், கொலை செய்யாதிருக்க நினைப்பவனே.
செல்வத்துட் செல்வஞ் செவிச்செல்வ மச்செல்வஞ்
செல்வத்து ளெல்லாந் தலை
இளங்குமரனார்
ஒருவன் பெற வேண்டும் செல்வங்களிலெல்லாம் உயர்ந்தது கேள்வியே; அதுபோன்ற செல்வம் வேறு இல்லை.
தம்மிற் பெரியார் தமரா வொழுகுதல்
வன்மையு ளெல்லாந் தலை
இளங்குமரனார்
தம்மைப் பார்க்கிலும் பெரியவர் தமக்கு நட்பாக அமையப் பெறுதல், வலிமைகளில் எல்லாம் வலிமையானது.
செறுநரைக் காணிற் சுமக்க விறுவரை
காணிற் கிழக்காந் தலை
இளங்குமரனார்
வலிமையுடையவரைக் கண்டால் பொறுத்து இருக்க. பின்னர் அந்நிலை தலைகீழாக மாறிவிடும்.
ஒருத்தாற்றும் பண்பினார் கண்ணுங்கண் ணோடிப்
பொறத்தாற்றும் பண்பே தலை
இளங்குமரனார்
தண்டித்தலே உடையவரிடத்தும் கண்ணோட்டத்தோடு பொறுத்துக்கொளலே சிறந்தது.
பழிமலைந் தெய்திய வாக்கத்திற் சான்றோர்
கழிநல் குரவே தலை
இளங்குமரனார்
பழியைக் கொண்டு அடையும் நன்மையிலும், உயர்ந் தோர்க்கு மிகு வறுமையே உயர்வாம்.
கடனறிந்து காலங் கருதி யிடனறிந்
தெண்ணி யுரைப்பான் றலை
இளங்குமரனார்
மேற்கொண்ட கடமையை அறிந்து, காலத்தை எண்ணி, தக்க இடத்தையும் ஆய்ந்து உரைப்பவன் சிறந்த தூதனாவான்.
கேடறியாக் கெட்ட விடத்தும் வளங்குன்றா
நாடென்ப நாட்டிற் றலை
இளங்குமரனார்
வறுமை அடையாததாய், அப்படி வறுமை அடையினும் செழுமை குறையாததாய் உள்ளநாடே உயர்நாடு.
உறுப்பமைந் தூறஞ்சா வெல்படை வேந்தன்
வெறுக்கையு ளெல்லாந் தலை
இளங்குமரனார்
பலபகுதிகளைக் கொண்ட வலிய வெற்றிப்படை நாட்டுச் செல்வங்களுள் எல்லாம் தலைமையானது.
அமரகத் தாற்றறுக்குங் கல்லாமா வன்னார்
தமரிற் றனிமை தலை
இளங்குமரனார்
போரில் அஞ்சி ஊடறுத்தோடும் விலங்கு போன்றவர் தொடர்பினும், தனித்திருத்தல் சிறந்தது.
பகல்கருதிப் பற்றா
செயினு மிகல்கருதியின்னாசெய் யாமை தலை
இளங்குமரனார்
பிரிதலை விரும்பி விரும்பாச் செயலைச் செய்தாலும் மாறாகத் தீமை செய்யாமை சிறந்தது.
ஆற்றுவா ராற்ற லிகழாமை; போற்றுவார்
போற்றலுள் எல்லாந் தலை
இளங்குமரனார்
செயல் வல்லாரை இகழாமை, தம்மைப்பேணுவதில் எல்லாம் தலையாயது.
சுழன்றுமேர்ப் பின்ன துலக மதனா
லுழன்று முழவே தலை
இளங்குமரனார்
உலகம் உழவையே நம்பி இயங்குகின்றது. அதனால் எவ்வளவு துன்பம் வரினும் உழவே உயர்ந்தது.