பெறின்
என்று முடியும் குறள்கள்
பெண்ணிற் பெருந்தக்க யாவுள கற்பென்னும்
திண்மையுண் டாகப் பெறின்
இளங்குமரனார்
கற்பெனப்படும் உறுதி உண்டானால், பெண்ணினும் பெருமைமிக்கவை எவையும் இல்லை.
எழுபிறப்புந் தீயவை தீண்டா பழிபிறங்காப்
பண்புடை மக்கட் பெறின்
இளங்குமரனார்
பழியில்லாத நல்ல மக்களைப் பெற்றால் வழிவழித் தலைமுறைக்கும் பழியில்லை.
அகனமர்ந் தீதலி னன்றே முகனமர்ந்
தின்சொல னாகப் பெறின்
இளங்குமரனார்
முகமலர்ந்து இனிய சொற்களைச் சொல்லுதல் மனம் மகிழ்ந்து கொடுத்தலினும் சிறந்ததாகும்.
தகுதி யெனவொன்று நன்றே பகுதியாற்
பாற்பட்ட டொழுகப் பெறின்
இளங்குமரனார்
எப்பகுதியையும் எண்ணிச் செயலாற்றினால் நடுவுநிலை என்பது ஒப்பற்ற ஒன்றாகும்.
சொற்கோட்ட மில்லது செப்ப மொருதலையா
வுட்கோட்ட மின்மை பெறின்
இளங்குமரனார்
உள்ளத்தில் மாறாத நடுவுநிலை இருந்தால் உரையிலும் மாறாத நடுவுநிலை அமைந்திருக்கும்.
செறிவறிந்து சீர்மை பயக்கு மறிவறிந்
தாற்றி னடங்கப் பெறின்
இளங்குமரனார்
அறிய வேண்டும் என அவற்றை அறிந்து முறையாக அடங்கினால் தக்க நன்மையை அது தரும்.
விழுப்பேற்றி னஃதொப்ப தில்லையார் மாட்டு
மழுக்காற்றி னன்மை பெறின்
இளங்குமரனார்
எவரிடத்தும் பொறாமை இல்லாதிருந்தால் அதனைப் போல்சிறந்த புகழ்ப்பேறு இல்லை.
உண்ணாமை வேண்டும் புலாலைப் பிறிதொன்றின்
புண்ண துணர்வார்ப் பெறின்
இளங்குமரனார்
புலாலை உண்ணாதிருத்தல் வேண்டும்; அது மற்றோர் உயிரின் புண் என்பது உணர்வுடையவர்க்கு விளங்கும்
நாளென வொன்றுபோற் காட்டி யுயிரீரும்
வாள துணர்வார்ப் பெறின்
இளங்குமரனார்
நாள் என்பது ஒன்று போலத் தோன்றி உயிரை அறுக்கும் வாள் என்பதை உணர்வாளர் அறிவர்.
கல்லா தவரு நனிநல்லர் கற்றார்முற்
சொல்லா திருக்கப் பெறின்
இளங்குமரனார்
கல்வியறிவாளர் முன் சொல்லாடாமல் இருப்பாரானால் அவரும் கற்றவர் போல் மிக நல்லவரே ஆவர்.
உள்ளிய தெய்த லெளிதுமன் மற்றுந்தா
னுள்ளிய துள்ளப் பெறின்
இளங்குமரனார்
நினைத்தது எளிதாக நிறைவேறும்; ஆனால் நினைக்கத் தக்கதை நினைப்பதாக இருத்தல் வேண்டும்.
விரைந்து தொழில்கேட்கு ஞாலம் நிரந்தினிது
சொல்லுதல் வல்லார்ப் பெறின்
இளங்குமரனார்
கேட்பவர் உளத்தொடு கலந்து இனிமையாகச் சொல்லும் திறம் இருப்பின் அவர் ஏவலை உலகமும் உடனே ஏற்கும்.
எண்ணிய வெண்ணியாங் கெய்துப வெண்ணியார்
திண்ணிய ராகப் பெறின்
இளங்குமரனார்
எண்ணுகின்றவர் உறுதியுடையவரானால், தாம் எண்ணியதை எண்ணியவாறு அடைவர்.
முகநோக்கி நிற்க வமையு மகநோக்கி
யுற்ற துணர்வார்ப் பெறின்.
இளங்குமரனார்
உள்ளத்தைப் பார்த்து ஆங்குள்ளதை உணர்வாரைப் பெற்றால் அவர் முகத்தைப் பார்த்த அளவானே புலனாம்.
பகைமையுங் கேண்மையுங் கண்ணுரைக்குங் கண்ணின்
வகைமை யுணர்வார்ப் பெறின்
இளங்குமரனார்
கண்காட்டும் குறிப்பு வகையை அறிவாரைப் பெற்றால் பகைநட்பு என்பவற்றைக் கண்களே காட்டிவிடும்.
மைய லொருவன் களித்தற்றாற் பேதைதன்
கையொன் றுடைமை பெறின்
இளங்குமரனார்
அறிவிலான் கையில் பெருஞ்செல்வம் பெற்றால் அது செருக்கன் ஒருவன் மதுவுண்டது போலாம்.
செறுவார்க்குச் சேணிகவா வின்ப மறிவிலா
வஞ்சும் பகைவர்ப் பெறின்
இளங்குமரனார்
அறிவில்லாதவரும் அஞ்சுபவரும் பெற்றால் பகைவர்க்கு நீங்காத இன்பமாகும்.
இன்மை யொருவற் கிளிவன்று சால்பென்னும்
திண்மையுண் டாகப் பெறின்
இளங்குமரனார்
சால்பு எனப்படும் உறுதி உண்டானால் வறுமை ஒருவனுக்கு இழிவாகாது.
ஊடுதல் காமத்திற் கின்பம் மதற்கின்பங்
கூடி முயங்கப் பெறின்
இளங்குமரனார்
ஊடுவது காதலுக்கு இன்பமாகும். அதற்கும் இன்பம் கூடித்தழுவுவதாகும்.