தொடர்பு
என்று முடியும் குறள்கள்
அன்போ டியைந்த வழக்கென்ப வாருயிர்க்
கென்போ டியைந்த தொடர்பு
இளங்குமரனார்
அரிய உயிர்க்கு உடலோடு அமைந்தத் தொடர்பு, அன்புடன் இருப்பதற்கே என்பர்.
நவிறொறு நூனயம் போலும் பயிறொறும்
பண்புடை யாளர் தொடர்பு
இளங்குமரனார்
சொல்லும் போதெல்லாம் நூற்சுவை பெருகுவது போன்றது பழகும் போதெல்லாம் பண்புடையவர் நட்பு.
கனவினு மின்னாது மன்னோ வினைவேறு
சொல்வேறு பட்டார் தொடர்பு
இளங்குமரனார்
செயல் வேறாகவும் சொல்வேறாகவும் உடையவர் நட்பு கனவில் காணினும் துன்பம் தருவதேயாம்.
எனைத்துங் குறுகுத லோம்பல் மனைக்கெழீஇ
மன்றிற் பழிப்பார் தொடர்பு
இளங்குமரனார்
வீட்டில் உறவாடிக் கூட்டத்தில் பழிப்பவர்தொடர்பைச் சிறிதும் நெருங்குதல் வேண்டா.
வாள்போல் பகைவரை அஞ்சற்க வஞ்சுக
கேள்போல் பகைவர் தொடர்பு
இளங்குமரனார்
வாள்போல் தாக்கும் பகைக்கு அஞ்ச வேண்டா; ஆனால் உறவாடிக் கெடுக்கும் பகைக்கு அஞ்சுக.
இருமனப் பெண்டிருங் கள்ளுங் கவறும்
திருநீக்கப் பட்டார் தொடர்பு
இளங்குமரனார்
பொதுமகளிரும் மதுவும் சூதும் நலங்களால் விலக்கப்பட்டவர் தொடர்பினவாகும்.